This page may contain traces of nuts!
|
|
| |
|
|
| |
This is where you stick random tidbits of information about yourself.
|
|
|
|
|
|
| |
þriðjudagur, desember 31, 2002
Áramót í Bristol nálgast óðfluga, ja eiginlega jafnhratt og heima á Íslandi og hvar sem áramótin eru ekki þegar gengin í garð - - eins og í Ástralíu og víðar. Þar fjarlægast áramótin álíka hratt og þau nálgast hér! Þetta var nú aldeilis merkileg uppgötvun.
Ég sakna þess aðeins að sjá ekki áramótauppgjör sjónvarpsstöðvanna heima. Kryddsíld á Stöð 2 og hvað þetta nú heitir á Rúv og svo fréttaannálarnir. Gaman að þeim. Þó ég sé kannski ekki alveg hlutlaus þá verð ég nú að segja að fréttaannáll Stöðvar 2 var alltaf svolítið flottari. Meira grín, meiri stælar og flottari framleiðsla en alveg sömu fréttirnar svona að megninu til.
Hér í UK eru allar sjónvarpsstöðvar fullar af best of þáttum. Áhorfendur velja það besta af hinu og þessu með því að hringja inn eða senda sms. Það kostar allt upp í eitt pund að greiða atkvæði og þegar mörg hundruð þúsund manns kjósa þá verður summan sem kemur út úr þessu dæmi ansi stór. Sjónvarpsstöðvarnar þurfa víst að bæta sér upp lækkandi auglýsingatekjur með því að sjónvarpa þáttum sem skila peningum beint í kassann. Málið er bara að þetta er mjög þreytandi sjónvarpefni því það er alltaf verið að segja manni hvernig á að kjósa og hvaða númer tilheyrir hvaða lagi, söngvara, bók, kvikmynd, leikara eðe hvað það nú er. Þriðjungur af þættinum er því oft bara endurtekning á því hvernig á að kjósa hvað. Svo er ekkert á hreinu að þessi atkvæði telji. Kannski er fólk fengið til að kjósa til að fá easy money og svo er sigurvegari valinn með hagsmuni sjónvarpsstöðvarinnar (eða framleiðandans) í huga. Það má velta þessu fyrir sér. Þegar sjónvarpssöðin er í eigu fyrirtækis sem hefur hagsmuna að gæta í t.d. bókaútgáfu, músik eða kvikmyndaframleiðslu þá er amk á hreinu að það skiptir miklu máli hver vinnur svona best of keppnir.
Nóg um það. Áramótin nálgast. Tveggja manna veisla hér á Görðunum í kvöld. Kalkúnn með stöffing og brúnaðar kartöflur og allur pakkinn. Púrtvín og kampavín og rauðvín og viský og hvaðeina. Verður samt frekar rólegt því Mæja þarf að mæta í vinnuna kl. 7 í fyrramálið og þarf að vakna hálf sex. Ég verð því að gjöra svo vel að vera til friðs.
Best of Björk á fóninum. Helvíti á hún mörg góð lög. Ég verð bara að segja það.
Gleðilegt ár
16:55
mánudagur, desember 30, 2002
Var að borða mest djúsí og heví súkkulaðiköku sem ég hef bragðað á ævinni. Luxury Chocolate Yule Log heitir hún og er frá Sainsbury´s. Úffa! Þetta er rúlluterta þar sem mjúku súkkulaðikremi er rúllað inn í aðeins harðara súkkulaði. Það fer voðalega lítið fyrir kökustöffinu sjálfu og í raun væri hið minnsta mál að smyrja þessari köku ofan á aðra köku, svo mikið er kremið í henni. Býst við að kakan eigi að nægja handa amk 10 manns. Borðaði þá fyrir 4 áðan. Gaman að því.
Vikuritið Time valdi indversku myndina Devdas bestu mynd þessa árs. Það er þá kannski komið að því að maður sjái indverska mynd í fyrsta skipti. Í öðru sæti varð kínversk mynd, í þriðja rússnesk og í því fjórða spænsk mynd. Nýjasta myndin hans Scorsese, Gangs of New York, varð í fimmta sæti. Greinilegt að maður ætti að veita myndum sem eru ekki frá USA aðeins meiri athygli. Málið er bara að þær eru matreiddar svo kyrfilega ofan í mann og m.a. þess vegna hafa þær mikið forskot. Maður þarf að hafa aðeins meira fyrir því að sjá hinar myndirnar. Bara það að muna nafnið á þeim krefst þess að maður skrifi það niður því það er alveg óvíst að maður sjái það nokkurn tíman aftur. Ég er t.d. alveg viss um að nafnið Devdas verði horfið úr huga mínum eftir klukkutíma og ég eigi aldrei eftir að sjá það aftur í fjölmiðlum. Best að skrifa það niður á gulan miða.
Versta mynd ársins var valin Men in Black II. Djöfull er ég sammála því. Algjört helvíti að sjá þessa mynd. Ég get samt lofað ykkur því að hún verður auglýst alveg massamikið þegar hún kemur út á DVD, mun seljast nokkuð grimmt og svo verður hún sett í besta slottið á Stöð 2 þegar að því kemur og Bo mun kynna hana sem stórskemmilega brellumynd í hæsta gæðaflokki.
Jæja best að fá sér aðeins meiri köku og klára helvítis stærðfræðina. Svo er spurning um að velja Ingibjörgu Sólrúnu mann ársins á Rúv. Veit ekki alveg með það samt. Svolítil prumpufýla af þessu máli. Veit að Úlli er vanur prumpufýlu og lætur þetta ekki á sig fá. Annað mál með Einar Mar. Hann er nú svolítill snyrtipinni og vill enga svona fýlu í kringum sig. Þetta gæti því orðið skemmtilegt umræðuefni á næsta ölfundi hjá þeim félögum.
16:14
Þá erum við komin aftur heim til Bristol eftir skemmtilega dvöl hjá Tolla og Hrund í London yfir jólin.
Tókum rútu frá Victoria coach station í London kl. 17 í gær og vorum komin heim á Freemantle Gardens fyrir kl. 20. Ferðin gekk sem sagt vel og áfallalaust.
Okkur Mæju tókst að skoða heilmikið í London yfir jólin. Á annan í jólum kíktum við á Westminster og Soho. Vorum að spá í að fara í London eye (Parísarhjólið mikla) en það var svo lágskýjað og þungt yfir að við hættum við. Betra að taka hringferð í björtu veðri. Verð að viðurkenna að stærðin á þessu apparati kom mér á óvart. Þetta gnæfir yfir öllu þarna í miðbænum.
Þennan dag sáum við No 10 Downing St. og þinghúsið og fleiri staði sem eru í fréttum hér á hverjum degi. Þetta var því heilmikil upplifun. Dagurinn endaði svo á góðu pöbbarölti við Piccadilly Circus og Leicester Square. Borðuðum á Fridays og ég fékk mér nautarifjasteik. Þeir hefðu frekar átt að kalla bitann nautarifjakæfu, svo mauksoðinn var hann. Mæli ekki með þessum stað.
Daginn eftir kíktum við á Tower bridge, City og Covent Garden. Mér fannst mjög gaman að rölta um City. Þetta er náttúrulega ein af fjármálamiðstöðvum heimsins og greinilegt að menn hafa í gegnum tíðina ekki byggt af neinum vanefnum þarna. Og enn er verið að byggja og nú eru það skýjakljúfar og marmara- og glerhallir. Reyndar var nú ekki mikið líf í City á þessum þriðja degi jóla. Flestir í fríi.
Um kvöldið kíktu Guðrún Norðfjörð, Jón Páll og Hildur systir Guðrúnar í heimsókn í Arlington Gardens (þar sem Tolli og Hrund búa). Sötruðum smá vín og spiluðum Trivial. Stelpurnar unnu og allt endaði í allsherjar slagsmálum. Kannski ekki alveg.
Á laugardeginum kíktum við í búðir og í Notting Hill. Töltum þar um og reyndum að spotta staði sem voru notaðir í senur í myndinni frægu. Á laugardögum er haldnir þar antík markaðir og var mikið líf og fjör á svæðinu. Eina antíkin sem ég keypti var gamalt Guiness plakat. Ánægður með það.
Um kvöldið fórum við Mæja út að borða og svo í leikhús. Sáum Sleuth sem er sýnt í Apollo Theatre. Michael Caine og Laurence Olivier léku í samnefndri mynd frá sjötíuogeitthvað. Ég sá myndina fyrir nokkru og fílaði mjög vel og hafði því áhuga á að sjá leikritið. Við urðum ekki fyrir vonbrigðum. Plottið er þykkt og leikararnir voru í gír. Sem sagt mjög gott kvöld í London.
Það sem stendur upp úr eftir þessa London heimsókn er svæðið í kringum Piccadilly Circus og Leicester Square. Svæðið nýtur sín vel í vetrarmyrkrinu enda allt vel upplýst með jólaljósum og auglýsingaskiltum. Allt troðið af fólki og mikið líf á götunum. Fílaði þetta allt saman massavel. En það er nóg sem á eftir að skoða og spurning hvort við mætum ekki aftur til London í sumar. Gaman að kíkja á borgina í sumargír. Mig minnir að Bon Jovi verði með tónleika þarna í júní 2003. Spurning um að skella sér þá. Eða þá þegar Rolling Stones verða á svæðinu í ágúst. Sjáum til.
Annars bara ágætt að vera komin aftur heim til Bristol. Ég var kominn með smá leið á því að hanga í tjúbinu í 2 tíma á dag og vera alltaf að troðast í gegnum endalausan mannfjöldann. Nú tekur námið bara við aftur. Ætla að reyna að klára stærðfræði verkefni fyrir áramót. Svo tek ég mér frí á nýársdag og svo hefst próflestur. Mæja þarf að vinna á nýársdagsmorgun svo við ætlum bara að taka rólegt gamlárskvöld. Fá okkur eitthvað gott að borða og drekka hóflega. Ekki spurning.
10:25
miðvikudagur, desember 25, 2002
Jóla jóla í London.
Áttum mjög skemmtilegt aðfangadagskvöld í góðum hópi hér heima hjá Hrund og Tolla sem búa í Chiswick hverfinu í London. Borðuðum hamborgarhrygg með Ora grænum baunum og öllu tilheyrandi. Magnús kokkur töfraði fram fullkomna máltíð. Svo voru pakkar teknir upp og allir voru í góðum gír. Fyrsta aðfangadagskvöldið mitt í útlöndum var sem sagt alveg stórfínt.
Í dag erum við svo bara í góðu tjillstuði. Horfðum á myndina Christmas Vacation með Chevy Chase og átum konfekt í morgunmat. Svo fórum við Mæja í góðan labbitúr niður að ánni Thames og tékkuðum á stemmingunni hjá tjöllunum. Þeir voru flestir innandyra að gæða sér á jólabúðing og horfa á drottninguna masa um eitthvað stórmerkilegt. Efast ekki um það. Sáum reyndar nokkra Indverja sem voru að leika sér í krikket úti á götu. Ég tók þá gáfulegu ákvörðun að blanda mér ekkert í þann leik.
Nú er hangikjötið í pottinum og allt að verða tilbúið fyrir átveislu númer tvö. Djöfull hlakka ég til að borða. Nammi namm. Það er til svo mikið af krásum hér í húsinu að ég held við gætum haldið hér til í nokkrar vikur án þess að fara út. Sá áðan pappakassa með ca 10 kílóum af íslensku nammi. Tolli á víst ættingja sem á sjoppu. Djöfull er það fínt!
18:24
mánudagur, desember 23, 2002
Helgin var róleg. Það er reyndar undantekning ef maður er eitthvað órólegur um helgar hérna í Bristol. Órólegasta helgin var líklega þegar Ægir félagi kom í heimsókn fyrir rúmum tveimur vikum. Þá fengum við okkur einn eða tvo öl!
Nú er maður eiginlega bara að smella í jólafrí. Ætla aðeins að dunda mér í smá verkefni í dag og svo förum við Mæja til London á morgun. Verðum hjá Hrund og kærasta hennar sem búa einhvers staðar í London. Hrund vann með Mæju á Íslensku auglýsingastofunni. Guðrún Norðfjörð (sem vann líka með Mæju á ÍA) og Jón Páll verða líka á svæðinu. Svo veit ég ekki betur en að við verðum með einkakokk til að elda ofan í okkur jólasteikina. Vinur Hrundar er menntaður kokkur og æltar að dvelja þarna um jólin.
Verðum líklega í London í 5 daga. Ég hlakka mikið til enda aldrei komið til London. Svo er líka langt síðan við höfum skemmt okkur með hópi af Íslendingum. Kominn tími á það.
Við munum örugglega taka einn eða tvo daga í túristapakkann. Kíkja á helstu kennileitin og svo er spurning um að smella sér á útsölur en þær byrja víst flestar 27. desember. Svo er ég að spá í að láta sérsníða á mig jakkaföt og fara á uppboð hjá Southebys. Vantar skúlptúr hér í stofuna. Svo langar mig líka að kaupa gamlan nærbol sem Elton John átti. Ekki smurning.
Liverpool gerði jafntefli um helgina.
piff
Held þeir hafi ekki gert neitt gott í heilan mánuð eða meira.
Þeir eru vanir að taka dýfu í desember og útiloka sig þannig frá meistaratitili. Nú slógu þeir tvær flugur í einu höggi með því að láta henda sér út úr Meistaradeildinni líka.
09:44
föstudagur, desember 20, 2002
Fór í jólagjafaleiðangur í miðbæinn í dag. Gekk svo sem ágætlega. Finnst samt vanta nokkrar búðir hér. Úrvalið ekki alveg nógu gott. Kannski líður borgin fyrir það að vera nokkuð stutt frá London. Héðan ganga lestir og rútur á 15 mínútna fresti til London og miðinn er ekki svo dýr. Ég er viss um að margir Bristol-búar fari til London fyrir jólin til að versla jólagjafir og kíkja kannski á leikhús eða eitthvað show í leiðinni.
Tókst samt að kaupa eitthvað. Til dæmis keypti ég þessa líka fínu trommukjuða handa sjálfum mér. Nú verða luft-trommurnar teknar með trompi. Hefur vantað það hér í Bristol.
Rakst líka á hits disk með Kiss. Keypti hann og er einmitt með hann í spilaranum núna. Shout it out loud í gangi as we speak. Spurning um að ná í kjuðana.
Mæja er að vinna núna á kvöldvakt hjá City Inn svo að ég hef smá speis í okkar litlu íbúð til að taka nokkra sólóa.
All right Detroit, segir Gene Simmons. You wanted the best, and you´ve got the best. Ekkert að þessu. Vonandi vex maður aldrei upp úr þessum pakka. Frétti áðan að Arnar er með jólapartý á Sóló í kvöld. Þori að veðja að Kiss verði á fóninum fyrr en síðar. Góða skemmtun segi ég nú bara. Verð frekar rólegur í kvöld.
21:05
fimmtudagur, desember 19, 2002
Þá er ég búinn að skila þremur verkefnum af fjórum. Þetta eina verkefni sem ég á eftir gildir 50% af stærðfræðikúrsinum. Ein formúla sem við eigum að stúdera og gera eitthvað voða gáfulegt við. Veit ekki alveg hvernig ég tækla það. Reddast samt fyrir rest. Ætla að byrja á því á laugaradaginn þannig að ég er í smá fríi núna. Fer reyndar aðeins í skólann á eftir en svo erum við að fara í jólaboð til Laux hjónanna. Þau eru leigusalarnir okkar. Veit ekki alveg hvort ég hlakka til að fara þangað. Þekki ekki hræðu og það er ekki eins og við Mæja og Laux hjónin séum vinir, þannig séð. Við bara leigjum af þeim. En verður örugglega ágætt. Það er ekki á hverjum degi sem okkur er boðið í partý hér í Bristol. Hefur eiginlega aldrei komið fyrir, satt best að segja.
Hr Laux er þýskur, með stóra bumbu sem lafir yfir gallabuxurnar og alltaf í bol sem hann girðir ofan í buxurnar. Helv flott. Svo er hann með nokkuð vænt yfirvaraskegg svo hann passar alveg inn í þýsku steríótýpuna. Frú Laux er líklega frá Indlandi eða þar í kring (veit bara mjög mikið hvaðan hún er). Hún er lítil og nett. Hún myndi ekki taka Hr Laux í glímu. Nokkuð viss um það.
Brisol Rovers, annað fótboltaliðið hér í borg, er að fara á hausinn. Þeim gengur ekki par vel í 2. deildinni um þessar mundir og eru einfaldlega að punda á sig á öllum vígstöðvum. Held þeir séu farnir að biðja almenning um ölmusu. Þetta er reyndar ekki eina fótboltaliðið í Bretlandi sem er í kröggum. Gary Lineker var fyrir örfáum dögum að bjarga Leicester sem var komið í vond mál. Emil Heskey, Liverpool framherji, er með í þeim díl. Setti nokkra tugi milljóna í pottinn. Þess má geta að ég hef einmitt tekið í spaðann á Emil Heskey. Þegar við Arnar vorum í Liverpool vorið 2001 að sjá Liv - Man Utd þá rákumst við á kauða á pub þar í bæ. Hann hafði þétt handtak enda mikill jaxl. Ég myndi líklega ekki taka hann í glímu.
10:47
miðvikudagur, desember 18, 2002
Í morgun var grasið hér í garðinum fyrir utan hélað. Þetta er í fyrsta skipti sem það gerist hér í haust. Annars hefur veðrið verið aðveg prýðilegt sl mánuði. Ekki mikil sól og svolítið blautt en þokkalega hlýtt og stillt. Ekkert að því. Ekkert helv rok og rigning eins og maður er svo vanur.
Var að vinna frameftir í gærkvöldi. Rétt um miðnætti er bankað á svalarhurðina (eða verandarhurðina, erum á jarðhæð) og standa þar tveir lögreglumenn og eru líka að banka á hurð nágrannans. Þeir spurðu mig hvort ég hefði rekist eitthvað á konuna sem býr þar. Enginn kom til dyra og þeir fóru. Svo kom aftur lögga í morgun og bankaði hjá henni. Eitthvað í gangi. Ca fertug kona sem býr þarna með ca tvítugum syni sínum. Veit ekkert hvaðan þau eru - gætu verið frá vesturströnd Afríku. Tala amk oft tungumál sem ég skil ekki bofs í og eru frekar mikið dökk á hörund. Sjáum hvað gerist.
Það var reyndar framið morð á skemmitstað hér ca 1 km í burtu núna um síðustu helgi. Þessi skemmtistaður er á Stapelton road sem er er alræmd glæpagata hér í borg. Kemst rendar á topp 5 í UK yfir glæpatíðni. Krakkhausar, hórur og glæpalýður á stjái á kvöldin og morð framin mjög reglulega. Maður á víst ekkert að hætta sér þangað þegar skyggja tekur. Við erum samt alveg í nokkuð safe hverfi, enda nokkuð lokuð af. Engir bófar á stjái hér - nema kannski nágranni okkar. Maður ætti kannski að fara að rifja upp gömlu kung foo taktana. Brjóta nokkra múrsteina með enninu og taka karate kid á pakkann.
Sjáum til
11:18
Jæja þá er maður kominn á netið eins og svo margir aðrir. Ekki seinna vænna að byrja svo maður verði ekki skilinn út undan. Ég sé fyrir mér að hér eigi margt gáfulegt eftir að birtast. Maður er nú þekktur fyrir sín gáfulegu komment. Ekki spurning með það.
Annars bara þokkalegur. Var að klára verkefni sem gildir 50% í Applied statistics kúrsinum. Nokkuð massíft stykki, 35 blaðsíður og þar af aðeins 4 myndir. Öfunda kennarann ekki að þurfa að eyða jólunum í að lesa þetta yfir. Well, hann fær borgað fyrir þetta. Ég fæ ekkrt borgað.
Súkkan er loksins seld. Var oðinn ansi tæpur hjá mér fjárhagurinn. Kom á besta tíma. Einhver gaur í Strandasýslu var svo heppinn að næla í gripinn. Súkkan á vissulega eftir að slá í gegn þarna fyrir vestan.
rokk og ról
01:43
|
|
| |
|
|
|
